Jöklarútan sat föst í hálfan sólarhring

Jöklarútan Sleipnir sat föst í krapa með 37 ferðamenn um borð í Geitlandi, skammt frá Langjökli í fyrradag.

Frétt af mbl.is

Risinn sem býr á jöklinum

Rútan er hugarfóstur Ástvalds Óskarssonar, sem sat einmitt við stýrið þegar óhappið átti sér stað.

„Þetta atvikaðist þannig að það var fastur bíll fyrir á veginum og ég ætlaði að fara út fyrir en þetta endaði svona,“ segir Ástvaldur.

Jöklarútan er hún sat pikkföst í krapanum í fyrradag. Ljósmynd/Aðsend

Losuð með jarðýtu og gröfu

Rútan festist í hádeginu í fyrradag og ekki tókst að losa hana fyrr en upp úr miðnætti með hjálp jarðýtu og gröfu.

Bíllinn er sennilega sá stærsti sinnar gerðar í öllum heiminum og eru dekkin 78 tommur, eða um tveir metrar í þvermál. Spurður segist Ástvaldur ekki hafa ofmetið kraftinn í Sleipni með því að hætta sér út fyrir veginn og í krapann. „Þú sérð ekki hvað er undir krapanum. Krapinn er versti óvinur jeppamannsins. Þetta er svo saklaust. Svo lendirðu ofan í gloppu og í hliðarhalla. Þá er ballið búið.“

Flestir ferðamannanna um borð voru Kínverjar og að sögn Ástvalds héldu þeir ró sinni. Öllum hafi verið hlýtt og þeir hafi komist þurrum fótum á land yfir í annan bíl, nokkrum klukkutímum síðar.

Ljósmynd/Aðsend

Þetta var í fyrsta sinn sem Ástvaldur festir jöklarútuna síðan hann hóf að keyra hana fyrir hálfu ári en eins og kunnugt er hefur verið mikil rigningartíð undanfarið. Rútan drap á sér í krapanum og stóð viðgerð yfir á henni í gær. 

„Náttúran er þannig að maðurinn á erfitt með að eiga við hana stundum.“

• 1 blogg um fréttina

Bloggað um fréttina

• Ómar Ragnarsson: Þegar stærð og þyngd vinna á móti.