Af átta dómurum er ein kona

Af átta hæstaréttardómurum er ein kona en konur voru 43% héraðsdómara í árslok 2017. Hlutfall kvenna í stöðu framkvæmdastjóra fer eftir stærð fyrirtækis og var það 22% hjá fyrirtækjum með 1-49 starfsmenn en 10% í fyrirtækjum með 250 starfsmenn eða fleiri árið 2016. Hlutfall kvenna af stjórnarmönnum var frá 26%–39% eftir stærð fyrirtækis. Þetta er meðal þess sem kemur fram á vef Hagstofu Íslands. Í dag er alþjóðlegur baráttudagur kvenna.

Rúmur helmingur kvenna 25–64 ára var með háskólamenntun árið 2017 samanborið við rúmlega þriðjung karla á sama aldri. Ef litið er til búsetu voru 56% kvenna og 43% karla á höfuðborgarsvæðinu með háskólamenntun en 41% kvenna og 20% karla utan höfuðborgarsvæðisins.

Þá voru 39% karla og 26% kvenna á höfuðborgarsvæðinu með starfs- og framhaldsmenntun en 47% karla og 29% kvenna utan höfuðborgarsvæðisins. Hlutfall karla og kvenna sem voru eingöngu með grunnmenntun var um helmingi hærra utan höfuðborgarsvæðisins en á því.

Atvinnuþátttaka kvenna var tæp 79% árið 2017, þátttaka karla var rúm 86%. Óleiðréttur launamunur kynjanna var 16% árið 2016 en rúm 14% hjá fullvinnandi launþegum. Konur eru nú 38% alþingismanna og 44% kjörinna sveitarstjórnarmanna en í mörgum öðrum áhrifastöðum er hlutur kvenna lægri. 

• 1 blogg um fréttina

Bloggað um fréttina

• Páll Vilhjálmsson: Sigríður tók stöðu með konum - fékk vanþakklæti og vantraust