Engar ódýrari landsliðstreyjur verða til sölu fyrir heimsmeistaramótið í knattspyrnu sem hefst í Rússlandi eftir átta daga. Rætt var um að barnatreyjan væri full dýr þegar nýja treyjan var sett í sölu í mars en strákarnir okkar spila í nýju treyjunum í Rússlandi.
Fullorðinstreyja kostar hjá flestum söluaðilum 11.990 en barnatreyjan 10.990. Þorvaldur Ólafsson, eigandi Errea á Íslandi, sagði í samtali við Vísi í mars að von væri á heilli fatalínu tengdri landsliðinu í aðdraganda HM. Þar yrðu ódýrari kostir, bæði í barna- og fullorðinsstærðum.
Einhverjir kunna að hafa misskilið ummæli Þorvalds frá því í mars en ekki er um að ræða landsliðstreyjuna sjálfa, heldur boli tengda landsliðinu segir hann í svari við fyrirspurn mbl.is.
Ódýrasta stuðningstreyjan kostar 2.990 krónur en hún er blá og búið er að skrifa „Ísland“ með hvítu letri yfir bringuna. Einnig eru merki KSÍ og Errea á treyjunni.
Allar Errea vörur tengdar landsliðinu má finna hér.