Telur ákvörðun ráðherra brjóta gegn lögum

Steingrímur Ari Arason, forstjóri Sjúkratrygginga Íslands.
Steingrímur Ari Arason, forstjóri Sjúkratrygginga Íslands. mbl.is

Sú staða sem er komin upp, það er að nýir læknar komast ekki að á rammasamning hjá SÍ vegna ákvörðunar ráðherra, brýtur í bága við lög að mati Steingríms Ara Ara­son, for­stjóra Sjúkra­trygg­inga Íslands.

Þetta er meðal þess sem fram kom í samtali hans við Björt Ólafsdóttir í þjóðmálaþættinum Þingvellir á K100 í morgun. Steingrímur hefur gagn­rýn­ir harðlega að þurfa að synja sér­fræðilækn­um um aðild að ramma­samn­ingi vegna fjár­skorts. „Það á ekki að skipuleggja heilbrigðisþjónustuna út frá veitendum heldur út frá notendunum, hinum sjúkratryggðu, og gera allt sem hægt er til að standa vörð um þeirra réttindi,“ sagði Stein­grím­ur.

Rammasamningur nýrra lækna við SÍ hefur verið til umfjöllunar í fjölmiðlum eftir að greint var frá því að Anna Björns­dótt­ir sér­fræðilækn­ir hefur lagt fram stjórn­sýslukæru í ljósi þess að hún fær ekki aðild að samn­ingn­um. Anna er sér­hæfð í Park­in­sons-sjúk­dómn­um og starfar á Duke-há­skóla­sjúkra­hús­inu í Norður-Karólínu. Í bréfi land­lækn­is til banda­rískra heil­brigðis­yf­ir­valda sagði að mik­il þörf væri á lækn­um hér á landi með þessa sér­fræðimennt­un og lagði Anna inn um­sókn að ramma­samn­ing­um til að opna stofu hér á landi. Um­sókn henn­ar var hafnað í ljósi þess að heil­brigðisráðherra hafði ákveðið að fleiri lækn­ar fengju ekki aðild að samn­ingn­um.

Tak­mörk­un­in sem um ræðir hófst í lok árs­ins 2015 vegna al­var­legr­ar fjár­hags­stöðu á fjár­lagaliðum Sjúkra­trygg­inga Íslands. Stofnunin óskaði eft­ir end­ur­skoðun ákvörðun­ar­inn­ar, en ráðuneytið staðfesti hana.

„Við fáum þau fyrirmæli að þetta stopp skuli halda áfram alveg óháð mati á þörf fyrir læknana inn á samninginn. Þá er það niðurstaða Sjúkratrygginga Íslands að það sé í algjörri andstöðu við samninginn og þau réttindi sem búið var að ákveða að fólk á að njóta,“ sagði Steingrímur í samtali við Björt í morgun.

Steingrímur segir að fyrirmæli ráðherra standist ekki samninginn. „Það eru ekki komin fram nein rök sem réttlæta það að hann hafi verið settur til hliðar með þessum hætti og þar með réttindi hinna sjúkratryggðu. Og það er það alvarlega í þessu. Ef að þetta hefði verið samningur um húsaleigu þá hefði engum dottið í hug að setja samninginn til hliðar, en af því að þetta er þjónustusamningur þá virðist það vera í lagi.“  

Hér má sjá og hlusta á viðtalið í heild sinni:

mbl.is
Fleira áhugavert
Fleira áhugavert