Óboðinn gestur í íbúðarhúsinu

Hjónin Jón Bernharð Kárason og Þórunn Beck.
Hjónin Jón Bernharð Kárason og Þórunn Beck. mbl.is/Emil Thorarensen

Það var heldur óskemmtileg reynsla sem hjónin Jón Bernharð Kárason, fyrrverandi sjómaður en núverandi safnari og listamaður á Fáskrúðsfirði, og Þórunn Beck, starfsmaður Loðnuvinnslunnar, urðu nýlega fyrir.

Jón Bernharð brá sér heim um hádegisbil einn dag í lok júní til að fá sér hressingu í einbýlishúsi sínu, sem var ólæst. Þegar hann fór inn í eldhús til að hita sér kaffisopa varð hann var við hreyfingu í svefnherberginu og sá mann gramsa í kommóðuskúffum, þar sem m.a. voru geymdir erfðagripir kynslóð fram af kynslóð.

Jón Bernharð, sem er stór og stæðilega vaxinn sjómaður, venti kvæði sínu í kross frá kaffikönnunni og yfir til hins óboðna gests og spurði hvern andskotann hann væri að gera í sínu húsi. Skipaði hann gestinum að hafa sig á brott hið snarasta.

Hinn óboðni gestur sá sitt óvænna og hljóp á dyr en sló í leiðinni Jón Bernharð bylmingshögg í magann. Jón hljóp á eftir honum á sokkaleistunum og sá þjófinn fara inn í bifreið sem beið fyrir neðan bakkann og brunaði á burt.

Lögreglan á staðnum var kölluð til og veitti bílnum eftirför en mennirnir sinntu ekki blikkandi bláum ljósunum. Brá lögreglan á það ráð að fá liðsinni kollega sinna á Héraði, sem komu á móti þjófunum og króuðu þá af í Breiðdalsvík. Þar valt bíll þeirra út af veginum og þeir náðust.

Í samtali við fréttaritara segja þau hjón Jón Bernharð og Þórunn ótrúlegt að hafa upplifað svona uppákomu, sem hafi haft langvarandi neikvæð sálræn áhrif á þau bæði. Segir Þórunn til að mynda að hún sofi ekki heilan svefn og heyri hún eitthvert þrusk á nóttunni sé hún með varann á og pikki í Jón bónda sinn og segi: það er einhver að koma.

Jón segir að til aðdáunar séu fumlaus og öguð vinnubrögð lögreglumannanna Elvars Óskarssonar og Grétars Geirssonar.

Mennirnir í farbanni

Mennirnir tveir, sem handteknir voru á Fáskrúðsfirði í lok júní, voru upphaflega úrskurðaðir í gæsluvarðhald en sæta nú farbanni til 8. ágúst. Þeir eru pólskir ríkisborgarar.

Mennirnir eru grunaðir um innbrot og þjófnaði en einnig er til rannsóknar árás annars þeirra á Jón Bernharð Kárason.

Elvar Óskarsson, lögreglufulltrúi hjá lögreglunni á Austurlandi, segir að ekki hafi þótt ástæða til þess að framlengja gæsluvarðhaldið yfir þeim. „Almennt séð eiga þetta ekki að vera íþyngjandi ráðstafanir og við gætum meðalhófs í beitingu gæsluvarðhalds.“

Hann segir mennina ekki hættulega. „Ekki í þeirri merkingu að þeir ógni lífi og heilsu fólks. Auðvitað eru þetta samt menn sem eru grunaðir um fleiri en eitt afbrot og þannig séð eru þeir grunaðir um að hafa staðið í brotastarfsemi hér á landi.“

Mennirnir komu til landsins 20. júní, að því er virðist í þeim eina tilgangi að fara ránshendi um landið. Þeir eru grunaðir um fjölmörg þjófnaðarbrot víða um landið en við leit lögreglu í bíl þeirra fundust m.a. skartgripir, úr og peningar, sem talið var þýfi.

Að sögn Elvars er vonast til þess að málið komi brátt inn á borð ákæruvaldsins.

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:

Bloggað um fréttina

Fleira áhugavert
Fleira áhugavert