Tækni & vísindi | mbl | 10.8.2018 | 6:29 | Uppfært 6:46

Horfðu til himins í fyrramálið

Myrkvinn verður mestur nyrst á landinu þar sem tungl nær að hylja 25% af þvermáli sólar og veldur 15% birtuminnkun. AFP

Í fyrramálið, laugardag, milli klukkan 8 og 9, sést deildarmyrkvi á sólu frá Íslandi, þar sem ský skyggja ekki á sólina. Í frétt um málið á vef Veðurstofunnar segir að í deildarmyrkva gangi tunglið fyrir hluta sólar. Við hámark á þessum myrkva hylur tunglið 17-25% af þvermáli sólar séð frá Íslandi.

Í Reykjavík hefst myrkvinn klukkan 08:10, en þá er sól 18° yfir sjónbaug. Hámarki nær deildarmyrkvinn þar klukkan 08:44, en þá er sólin komin 21° yfir sjónbaug. Þá hylur tunglið 20% af þvermáli sólar og birtuminnkun er 10%.

Deildarmyrkvanum lýkur í Reykjavík klukkan 09:19 en þá er sólin komin 25° yfir sjónbaug. Myrkvinn verður mestur nyrst á landinu þar sem tungl nær að hylja 25% af þvermáli sólar og veldur 15% birtuminnkun. Þessi sólmyrkvi sést hvergi á jörðinni sem almyrkvi, segir í frétt Veðurstofunnar.

Nauðsynlegt að nota hlífðarbúnað

Þegar horft er á sólmyrkvann er nauðsynlegt að nota viðeigandi hlífðarbúnað. Sævar Helgi Bragason, umsjónarmaður Stjörnufræðivefjarins, mælir með sólmyrkvagleraugum eða logsuðugleri.

„Það sést ekkert með berum augum, það þarf sólmyrkvagleraugu, en það virkar líka að horfa í gegnum logsuðugler. Venjuleg sólgleraugu virka ekki því þau ná ekki að deyfa ljósið frá sólinni nógu vel,“ segir Sævar. Sýnileiki sólmyrkvans fer algerlega eftir veðri en hann mun sjást þar sem er heiðskírt.

Ætti að sjást vel

Spáin gerir ráð fyrir því að háský verði yfir borginni og eru því góðir möguleikar á að sjá sólmyrkvann, að sögn Haralds Eiríkssonar veðurfræðings.

„Ég myndi álíta að veðurskilyrði væru best á Norðurlandi, í Eyjafirði og jafnvel Skagafirði. Spáin lítur líka vel út á Suður- og Suðausturlandi. En það er um að gera að fylgjast með spánni, hún getur alltaf breyst eins og við þekkjum,“ segir Haraldur.