Landssamband smábátaeigenda krefst tafarlausrar lækkunar veiðigjalda og að þau taki mið af afkomu einstakra útgerðarflokka en ekki meðaltalsafkomu í sjávarútveginum.

Þetta kemur fram í ályktun 34. aðalfundar sambandsins, sem lauk í síðustu viku. Forsvarsmenn sambandsins fóru á fund atvinnuveganefndar Alþingis fyrr í dag og kynntu þar umsögn sína við nýtt frumvarp til laga um veiðigjöld.

Skorar sambandið á atvinnuveganefnd að hvika ekki frá sjónarmiði sínu um leiðréttingu á veiðigjöldum síðastliðins fiskveiðiárs hjá litlum og meðalstórum útgerðum, en í umsögninni kemur meðal annars fram sú skoðun félagsins að krókaaflamarksbátar og bátar minni en 30 brúttótonn falli undir þann flokk.  

Í ályktuninni sem samþykkt var á aðalfundinum var forysta sambandsins enn fremur brýnd til að berjast „með kjafti og klóm“ fyrir stórfelldri lækkun veiðigjalda. Þá var um leið skorað á Alþingi að hækka frítekjumark í 40% af fyrstu fimm milljónum króna veiðigjaldsins og 20% af næstu fimm milljónum króna þess. Var jafnframt skorað á Alþingi að leiðrétta nú þegar hlut smábáta í veiðigjaldinu frá og með fiskveiðiárinu 2017/2018.

Tengdar fréttir

Veiðigjöld

Veiðigjöld tóku breytingum

• Greiddu rúma 10 milljarða í veiðigjöld
• 7,9 milljarða í veiðigjöld á 9 mánuðum
• Auðlindagjöld skili 12,2 milljörðum króna
• Mestu veiðigjöld síðustu fimm ár

» Fleiri tengdar fréttir

• 1 blogg um fréttina

Bloggað um fréttina

• Sindri Karl Sigurðsson: Eðli veiðigjalda