Eimskip hefur skráð gámaskip félagsins, Goðafoss, Dettifoss, Lagarfoss og Selfoss, í Þórshöfn í Færeyjum. Eignarhald skipana hefur verið í Færeyjum og hagkvæmis sjónarmið ráða því að skipin eru nú skráð þar, samkvæmt upplýsingum Ólafs William Hand, upplýsingafulltrúa Eimskips.
Skipin voru áður skráð í St. John á eyjunni Antigua, en eignarhald þeirra er nú hjá Faroeship, dótturfyrirtæki Eimskips í Færeyjum. Íslenskar áhafnir eru á skipunum fjórum. Aðspurður hvers vegna skipin eru ekki skráð á Íslandi segir Ólafur að löggjöfin á Íslandi sé ekki samkeppnishæf við löggjöfina í Færeyjum.
„Við erum að vinna á alþjóðlegum markaði og því skrá menn skipin þar sem skipaskráning er hagkvæmari. Eins og í Færeyjum.“ segir Ólafur, í Morgunblaðinu í dag.