25 eftirskjálftar hafa mælst

Um 25 eftirskjálftar hafa fylgt í kjölfar snarps jarðskjálfta sem varð á Hellisheiði laust fyrir klukkan þrjú í nótt. Að sögn veðurfræðings er ekki um óeðlilega virkni að ræða.

„Það hafa komið í kringum 25 eftirskjálftar en þeir eru allir miklu minni. Sá stærsti var 1,8 en þessi stóri var 4,4,“ sagði veðurfræðingur Veðurstofu Íslands í samtali við mbl.is

Frétt af mbl.is

Snarpur jarðskjálfti á Hellisheiði

Ekki er útlit fyrir að nokkur hafi fundið fyrir eftirskjálftunum, en fjölmargir urðu hins stóra varir á suðvesturhorninu í nótt og bárust Veðurstofu nokkur hundruð tilkynningar.

Að sögn veðurfræðings er um virkt jarðskjálftasvæði að ræða.

„Þetta er virkt skjálftasvæði sem skjálftinn verður á. Hann verður alveg vestast í suðurlandsbrotabeltinu og það er í rauninni bara brotabelti sem kemur út frá Reykjanesskaganum. Þetta eru flekaskilin sem að Ísland stendur á. Þessir skjálftar verða vegna sprunguhreyfinga á flekaskilunum.

Í rauninni er þetta eðlileg virkni. Svona stórir skjálftar verða náttúrlega ekkert mjög oft en það er alveg í hverri viku sem það eru litlir skjálftar þarna þannig að þetta er virkt jarðskjálftasvæði.“

Lögreglan á Suðurlandi skrifar um skjálftann á facebooksíðu sinni og bendir á fræðsluefni almannavarna um jarðskjálfta. 

• 1 blogg um fréttina

Bloggað um fréttina

• S i g u r ð u r S i g u r ð a r s o n: Engir jarðskjálftar á Hellisheiði