Snjallsímabann stórbætti skólabraginn

„Það er þvílíkur munur í frímínútum að sjá nemendur hér leika sér, spjalla, lesa. Það er bara frábært að sjá þetta,“ segir Þórhildur Elfarsdóttir, skólastjóri í Varmárskóla í Mosfellsbæ, en þar tók bann við notkun snjallsíma gildi í eldri deild eftir áramót. Skólabragurinn hefur stórbatnað í kjölfarið.

Ég heimsótti Varmárskóla og í myndskeiðinu er rætt við nemendur og kennara ásamt Þórhildi. Krakkarnir eru sammála um að breytingin hafi verið til góðs en þau fengu að hafa áhrif á hvernig væri best að útfæra hana. 

Séu nemendur með símana á lofti innan veggja skólans þurfa þeir að afhenda starfsfólki skólans símann og geta fengið hann til baka við lok dags. Hins vegar mega þeir vera með þá í skápum sínum eða vösum og sumir kennarar leyfa notkun þeirra stundum inni í skólastofum ef hún tengist námsefninu.

Fleiri skólar hafa gripið til þessa ráðs og búast má við að þeim fari fjölgandi ef marka má reynsluna úr Mosfellsbæ. 

• Blogga um frétt