Hafrannsóknastofnun mun ekki leggja til að aflaheimildir verði gefnar út fyrir loðnu að sinni. Þetta er niðurstaðan eftir að síðasta loðnuleiðangri stofnunarinnar í samstarfi við útgerðir lauk þegar skipin komu til hafnar í gærkvöldi.
„Verkefni þeirra skipa sem hafa verið í leit undanfarnar vikur lauk í gær. Næstu skref, varðandi hvort og þá hvernig verði farið í frekari leit, verða rædd á fundi með fulltrúum útgerða á morgun,“ segir Þorsteinn Sigurðsson, sviðsstjóri uppsjávarlífríkissviðs hjá Hafrannsóknastofnun.
„Staðan er hins vegar sú, að bæði rannsóknaskip stofnunarinnar eru að fara í árlegt togararall. Þess vegna veit ég ekki hvað verður og það veltur svolítið á viðhorfi útvegsmanna.“
Spurður hvenær togararallinu lýkur og skip stofnunarinnar verði þar með laus til annarra verkefna, svarar Þorsteinn: „Það er í raun eftir að allt er orðið um seinan, þetta eru um 25 daga túrar. Vanalega hefur loðnuvertíð verið að ljúka upp úr miðjum mars, nema eitthvað afbrigðilegt hafi gerst.“