Þóttist vera lögga og handtók mann

Héraðssaksóknari hefur ákært karlmann á fertugsaldri fyrir brot gegn valdstjórninni, ólögmæta nauðung og gripdeild. Hann þóttist vera lögreglumaður og framkvæmdi leit á starfsmönnum hótels í miðbæ Reykjavíkur undir því yfirskini.

Atvikið átti sér stað í mars fyrir þremur árum en maðurinn kynnti sig sem lögreglumann fyrir starfsmönnum hótelsins og sýndi þeim skilríki með lögreglustjörnu og númeri. 

Fram kemur í ákæru að maðurinn hafi framkvæmt leit á þeim með því að þreifa á þeim og fara í vasa þeirra og taka þaðan tóbak. Að því loknu dró hann starfsmann hótels með sér á lögreglustöðina við Hverfisgötu.

Þegar þangað var komið var maðurinn sem þóttist vera lögreglumaður handtekinn. 

Í ákæru segir að með háttsemi sinni hafi ákærði tekið sér lögregluvald, sem hann hafði ekki, notað í þeim tilgangi heimatilbúin lögregluskilríki sem voru áþekk lögregluskilríkjum og beitt mann ólögmætri nauðung.

Þess er krafist að ákærði verði dæmdur til refsingar og greiðslu alls sakarkostnaðar.

• 1 blogg um fréttina

Bloggað um fréttina

• Jóhannes Ragnarsson: Þá þekki eg ekki mann fyrir annan mann