200 mílur | mbl | 30.3.2019 | 21:51 | Uppfært 31.3.2019 3:36

Vill leyfi til að farga Sigurfara

Kútter Sigurfari. Ljósmynd/Akraneskaupstaður

Bæjarráð Akraneskaupstaðar hefur óskað eftir leyfi frá Minjastofnun til þess að farga kútter Sigurfara sem staðið hefur við Byggðasafnið í Görðum á Akranesi undanfarna áratugi. Bréf þessa efnis var lagt fram á fundi ráðsins á miðvikudaginn. Áður en skipinu verði fargað, fáist til þess leyfi, verður áhugasömum gefinn kostur á að eignast skipið.

Telur bæjarráðið að skipið, sem var smíðað árið 1885 í Englandi og keypt til Íslands upphaflega 1897, hafi verið rannsakað nægjanlega til þess að óhætt sé að farga því.

„Með þeim rannsóknum sem framkvæmdar voru telur Akraneskaupstaður sig hafa sinnt rannsóknum á kútter Sigurfara með fullnægjandi hætti en m.a. var haldið alþjóðlegt málþing og ítarleg rannsókn framkvæmd. Skrásetning var á heimildum um kútterinn, söfnun heimilda í munnlegri geymd, söfnun ljósmynda, skrásetning á byggingarlagi kúttersins og skrásetning á heildarmynd skipsins,“ segir í fundagerð bæjarráðsins.

Bæjarráð samþykkti bréfið til Minjastofnunar en þar segir meðal annars:

„Með niðurstöðum rannsóknanna og þeirri staðreynd að ekki er um skráðan safngrip að ræða óskar bæjarráð Akraness hér með eftir heimild Minjastofnunar Íslands til förgunar á kútter Sigurfara sem stendur á svæði Byggðasafnsins í Görðum Akranesi. Áður en til förgunar kemur yrði áhugasömum aðilum gefinn kostur á að eignast skipið en ef ekki næst samkomulag um slíkt yrði skipinu fargað.“