„Grundvöllur víðtækrar sáttar“
Setja bókamerki
Katrín Jakobsdóttir forsætisráðherra segir að aðgerðir stjórnvalda og kjarasamningarnir sem hafa núna náðst á vinnumarkaði séu grundvöllur víðtækrar sáttar og skapi forsendur fyrir bæði félagslegan og efnahagslegan stöðugleika til langs tíma.
„Af hálfu stjórnvalda er um að ræða mikilvægar samfélagslegar umbætur, hvort sem um er að ræða réttlátara skattkerfi, uppbyggingu á félagslegu húsnæðiskerfi eða lengingu fæðingarorlofs; allt mun þetta styðja við aukna velsæld alls almennings og aukinn jöfnuð,“ segir Katrín í tilkynningu en kynning á kjarasamningunum fer fram í Ráðherrabústaðnum.
Fram kemur í tilkynningunni að aðgerðirnar séu víðtækar og stuðli samfélagslegum umbótum fyrir allan almenning,
Sérstaklega er horft til þess að styðja við ungt barnafólk og tekjulága. Aðgerðirnar eru afrakstur samráðs stjórnvalda og aðila vinnumarkaðarins undanfarið ár.
Hér er stiklað á stóru varðandi samningana:
- 42 aðgerðir til stuðnings lífskjarasamningum.
- Heildarumfang á samningstímabilinu 80 milljarðar.
- Fæðingarorlof lengt í 12 mánuði.
- Samanlagt geta breytingar á tekjuskattskerfi og barnabótum aukið ráðstöfunartekjur fjögurra manna fjölskyldu um allt að 411 þúsund krónur á ári.
- Víðtækar aðgerðir í húsnæðismálum og uppbygging félagslegs húsnæðiskerfis.
- Dregið úr vægi verðtryggingar og ný neytendalán miðist við vísitölu án húsnæðisliðar.
- Markvissar aðgerðir gegn félagslegum undirboðum.
- Barnabætur verði hækkaðar um 16% og dregið úr skerðingum barnabóta fyrir tekjulægri en skerðingarmörk fara þá frá árinu 2018 úr 242 í 325 þúsund krónur.
- Heimild til að ráðstafa megi 3,5% lífeyrisiðgjalds skattfrjálst til húsnæðiskaupa. Sambúðarfólk með samtals 650.000 í mánaðarlaun gæti svo dæmi sé tekið valið að nýta 273.000 krónur árlega skattfrjálst til öflunar húsnæðis.
- Óverðtryggð íbúðalán verði valkostur fyrir alla tekjuhópa.
- Heimild til að ráðstafa séreignarsparnaði inn á íbúðalán framlengd í tvö ár.
- Ríki og sveitarfélög munu stuðla að verðstöðugleika með því að hækka ekki gjaldskrár umfram 2,5% árið 2020 og minna ef verðbólga er minni.
Kynning á yfirlýsingu vegna kjarasamninga
Yfirlýsing ríkisstjórnarinnar um verðtryggingu
Stuðningur stjórnvalda við lífskjarasamninga
„Stjórnvöld eru í færi til að styðja við ábyrga kjarasamninga vegna styrkrar stöðu ríkissjóðs. Lækkun tryggingagjalds hefur nýlega verið lögfest og nú verða skattar á launatekjur lækkaðir í áföngum,“ segir Bjarni Benediktsson, fjármála- og efnahagsráðherra, í tilkynningunni.
„Til verður nýtt lægra skattþrep sem tryggir mestan ávinning, 10.000 kr. á mánuði, til þeirra tekjulægstu á vinnumarkaði. Það er viðbótarskattalækkun fyrir þennan hóp frá því sem nýlega var kynnt. Heildaráhrifin eru til um 20 milljarða skattalækkunar sem jafngildir um 10% af heildarskattstofninum. Því er um að ræða eina allra stærstu skattaaðgerð seinni ára.“
Sigurður Ingi Jóhannsson, samgöngu- og sveitarstjórnarráðherra, hefur þetta að segja um samninganna: „Ég lít svo á að gríðarlega stórt skref hafi verið stigið hér í dag, skref í átt að samfélagi þar sem skilyrði fyrir lífsgæðum ertu tryggð fleirum en hingað til hefur verið. Aðilar vinnumarkaðarins hafa náð ábyrgum samningum sem í samspili við útspil ríkisstjórnarinnar skapa skilyrði til stöðugleika, sérstaklega hvað varðar húsnæðismarkaðinn. Þau markvissu skref sem stigin eru í átt að afnámi verðtryggingar eru síðan sérstakt ánægjuefni fyrir Framsókn sem hefur lagt mikla áherslu á að áhrif hennar á kjör almennings verði takmörkuð sem mest.“
„Á réttri leið en nokkuð í land ennþá“
Tapa fimm milljónum á dag
Moses Hightower og Prins Póló gefa út eyjalag
Æskuvinur Íslendings myrtur í Noregi
Vona að Orkustofnun veiti ekki virkjunarleyfi
Fiskikóngurinn: „Mér fannst sárt að heyra það“
„Þetta náttúrulega endar með ósköpum“