Slökkviliðið á höfuðborgarsvæðinu var kallað út nú á tíunda tímanum í kvöld eftir að tilkynning barst um eld í ljósastaur í Lágmúla.
Varðstjóri hjá slökkviliðinu sagði í samtali við mbl.is að slökkviliðsmenn væru nýkomnir á staðinn og var ekkert vitað um upptök eldsins á þeirri stundu. Sjaldgæft væri þó að eldur kviknaði á slíkum stað.
Að sögn sjónarvotta á vettvangi virkaði ekki slökkvitæki sem lögregla reyndi að beita á eldinn en greiðlega gekk að slökkva hann er slökkvilið mætti á staðinn.