Á „bólakaf“ í Kaldaklofskvísl til að ná bílnum upp úr

Björgunarsveitum frá Hellu og Hvolsvelli tókst að ná bifreið sem festist í Kaldaklofskvísl að Fjallabaki í morgun upp úr ánni í hádeginu. Fara þurfti undir bílinn til að festa við hann kaðal svo að draga mætti bifreiðina upp úr ánni. 

Ökumaður bifreiðarinnar hafði verið á þaki hennar í um tvær klukkustundir þegar björgunarmenn komu að. Bifreiðin var þá farin að grafast niður og mátti því ekki tæpara standa að bjarga manninum. 

Frétt af mbl.is

Á þaki bílsins í tvær klukkustundir

Jónas Guðmundsson, verkefnisstjóri slysavarna hjá Landsbjörg, segir að um erlendan ökumann hafi verið að ræða. Maðurinn var á jeppa sem „á flestum dögum hefði farið þarna léttilega yfir“, segir Jónas, en vegna rigninga hefur vaxið mikið í ám á hálendinu. 

„Það tók einhvern tíma að ná bílnum upp úr, maður þarf að fara á bólakaf undir svo það er ekki auðvelt að komast að þessu. Einhver þarf að fórna sér og fara undir bílinn til að festa kaðalinn. Það er mikið í þessari á, það eru bara örfáir dagar síðan það var fært á jepplingum yfir hana en núna er þetta bara fyrir breytta bíla og vana menn,“ segir Jónas.

• 1 blogg um fréttina

Bloggað um fréttina

• Ómar Ragnarsson: Dráttartóg allan tímann í svona ferðalögum! Kötturinn sagði: "ekki ég..."