Segir tillögurnar „ófaglegt fúsk“
Setja bókamerki
Sigurborg Ósk Haraldsdóttir, borgarfulltrúi Pírata og formaður skipulags- og samgönguráðs, segir tillögu sem Sjálfstæðisflokkurinn hyggst leggja fram á borgarstjórnarfundi um að breyting verði gerð á aðalskipulagi borgarinnar „ófaglegt fúsk“.
Í tillögunni felst að íbúabyggð á Keldum og í Örfirisey verði heimiluð. Samhliða því verði ráðist í skipulagningu atvinnulóða á Keldum.
Í greinargerð Sjálfstæðisflokks segir að meirihlutinn í borgarstjórn gangi út frá því að hægt sé að koma íbúabyggð sem nemi 4.000 íbúðum á flugvallarsvæðið í Vatnsmýrinni. Að mati Sjálfstæðisflokks liggi þó fyrir að ekkert verði byggt í Vatnsmýrinni á næstu 10 til 20 árum enda hafi ekki verið ákveðið hvar annað flugvallarstæði yrði staðsett.
Enn fremur sé útlit fyrir að vegna efnahagslægðar í kjölfar heimfaraldursins muni tæplega verða ráðist í framkvæmdir við lagningu nýs flugvallar, framkvæmd sem oddviti Sjálfstæðisflokks segir að muni kosta um 100 milljarða. Að þessu gefnu sé ljóst að gat upp á 4.000 íbúðir sé í húsnæðisáætlun borgarinnar en hún gerir ráð fyrir því að um 1.000 íbúðir verði byggðar á ári til ársins 2040.
Sigurborg segist ekki vera sammála því sem kemur fram í greinargerðinni.
„Ég myndi segja að þessar tillögur Sjálfstæðisflokksins væru ófaglegt fúsk sem ég get engan veginn tekið undir. Þvert á móti hefur verið kröftugur vöxtur í borginni undanfarin ár og það stefnir núna í að það verði í fyrsta sinn í langan tíma hlutfallslega meiri vöxtur í Reykjavík en í nágrannasveitarfélögum,“ segir Sigurborg í samtali við mbl.is.
„Það er ekkert gat í húsnæðisáætlun borgarinnar. Borgin mun ná sínum markmiðum um íbúðaruppbyggingu meðfram borgarlínu og í Ártúnshöfða og við höfum verið að sjá það að borgarlínan færir okkur dýrmæta þéttingarreiti og möguleikann á því að reisa þetta nýja hverfi í Ártúnshöfða þar sem borgarlínan verður hryggjarstykkið í uppbyggingunni,“ segir Sigurborg.
Illa unnin kosningarloforð
Sigurborg segir löngu búið að sýna fram á að tillögur Sjálfstæðisflokksins séu ekki vel unnar.
„Ég myndi segja að það að draga upp illa unnin kosningaloforð á miðju kjörtímabili sé ekki sterkur leikur hjá Sjálfstæðisflokknum þar sem það er löngu búið að sýna fram á hversu slæmar þær tillögur voru,“ segir Sigurborg.
Hún segir að í ljós verði að koma hvenær hægt verði að ráðast í framkvæmdir við lagningu nýs flugvallar. Svarið geti þó aldrei verið að byggja á Keldum eða í Örfirisey. „Það bara gengur ekki upp samgöngulega séð. Það á að sjálfsögðu að byggja á Keldum en það verður ekki hægt fyrr en borgarlínan kemur þangað. Það verður að haldast í hendur,“ segir Sigurborg.
„Við erum komin með nóg af því að dreifa byggð þar sem fólk er neytt til þess að nota einkabílinn. Það eru í grunninn samgöngur sem í dag gera það að verkum að þessir staðir ganga ekki upp.“
„Okkur miðar í rétta átt“
„Hvílir mikil leynd yfir þessu öllu“
„Það þarf að vinna mikinn fjölda upp“
Tapa fimm milljónum á dag
Æskuvinur Íslendings myrtur í Noregi
Tveir í bílnum sem lenti utan vegar
Verðbólgan komin niður í 6%