Innlent | mbl | 15.3.2021 | 23:10 | Uppfært 16.3.2021 7:14

Skjálfti 4,3 að stærð fannst víða

Hér má sjá hvar skjálftavirknin var mest á Reykjanesskaga í dag. Sem fyrr er hún mest við Fagradalsfjall, þar sem kvikugangur fikrar sig sífellt ofar í jarðskorpuna. Kort/Veðurstofa Íslands

Jarðskjálfti 4,3 að stærð fannst vel á höfuðborgarsvæðinu nú klukkan 22:32 og í tilkynningu frá Veðurstofu Íslands segir að hann hafi fundist alla leið upp í Borgarfjörð.

Alls hafa um 1.800 jarðskjálftar mælst á Reykjanesskaga í dag, þar af voru sjö þeirra 3 að stærð eða stærri. Virknin í dag hefur að mestu leyti verið við Fagradalsfjall og í kvöld hafa flestir skjálftar verið staðsettir við NA-vert Fagradalsfjall, eins og segir í tilkynningu.

Í gær mældust um 2.400 skjálftar og enn fleiri á föstudag og laugardag eða allt að 2.800 skjálftar á dag.