Katrín og Scholz vilja útvíkka samstarf

„Ég er mjög ánægð með fundinn og heimsóknina til Berlínar. Þýskaland er mikilvægur bandamaður Íslands, bæði pólitískt og efnahagslega en ekki síður menningarlega. Ríkin hafa átt í góðu samstarfi og við deilum vilja til að útvíkka samstarfið enn frekar,“ sagði Katrín Jakobsdóttir forsætisráðherra á sameiginlegum blaðamannafundi eftir tvíhliða fund hennar með Olaf Scholz, kansl­ara Þýska­lands í Berlín í dag.

Leiðtogarnir voru spurðir út í stríðið í Úkraínu en Katrín sagði ríkin tvö staðföst og sameinuð í stuðningi við Úkraínu og að þau fordæmi árásir Rússa á óbreytta borgara og borgaralega innviði. Þá sagði hún samstöðu Evrópu og bandamanna okkar hinum megin Atlantshafsins vera mikilvægustu afleiðingu þessa hræðilega stríðs.

Katrín sagðist myndu taka hlýlega á móti kanslaranum á leiðtogafundi Evrópuráðsins í maí á Íslandi. Hún sagði ráðið mikilvæg stofnun í Evrópu og gildi hennar mikilvæg en Ísland fer með formennsku í Evrópuráðinu síðan í nóvember síðastliðinn.

Hún sagði Ísland ekki hafa áform um að ganga í Evrópusambandið á næstu árum og það væri ekki á stefnuskrá hennar ríkisstjórnar en að Ísland liti á Evrópu og Evrópuríkin sem sína nánustu vini og bandamenn og að Íslendingar njóti samstarfs við Evrópu innan evrópska efnahagssamningsins.

Í morg­un heim­sótti for­sæt­is­ráðherra höfuðstöðvar ís­lenska leikja­fyr­ir­tæk­is­ins Klang Games og þá tók hún þátt í há­degisviðburði á veg­um hug­veit­unn­ar Kör­ber Stift­ung þar sem fjallað var um for­mennsku Íslands í Evr­ópuráðinu, mann­rétt­indi, lýðræði, ör­ygg­is­mál í Evr­ópu og stríðið í Úkraínu.

• 1 blogg um fréttina

Bloggað um fréttina

• Gunnar Heiðarsson: Að útvíkka samstarf