Kosið á milli tveggja kosta við uppstillingu á lista í NV-kjördæmi
Að undanförnu hefur talsverð umræða farið fram meðal flokksmanna í kjördæminu og um tíma virtist sem sátt væri um að uppstillingarleiðin yrði farin en nú er ljóst að svo er ekki.
Samkvæmt upplýsingum Skessuhorns er mest fylgi við prófkjörsleiðina í sitt hvorum enda kjördæmisins en á Vestfjörðum er fylgi meira við uppstillingu. Allir þrír þingmenn flokksins hafa lýst yfir áhuga á að taka sæti á listanum og nái þeir kjöri verða þeir meðal þeirra þingmanna er lengst hafa setið á þingi. Einar Kristinn Guðfinnsson og Sturla Böðvarsson hafa setið samfellt á þingi síðan 1991 og Einar Oddur Kristjánsson hefur setið á þingi síðan 1995. Rúmur aldarfjórðungur er síðan Einar Kristinn tók fyrst sæti á Alþingi en það var árið 1980 og Sturla tók fyrst sæti á þingi árið 1984. Margir þeirra sem nú eru að draga sig í hlé frá þingsetu hafa setið svipað lengi eða skemur. Enginn hefur beinlínis gefið kost á sér til setu á listanum í sæti sitjandi þingmanna en það kann að breytast verði ákveðið að fara prófkjörsleiðina. Sumir þeirra sem rætt var við töldu erfitt að hafna prófkjörsleiðinni, komi tillaga á annað borð fram um þá leið, þar sem nú stefnir í að prófkjör verði haldið hjá flokknum í öðrum kjördæmum. Aðrir benda á að síðast hafi verið haldið prófkjör í kjördæminu á sama tíma og raðað hafi verið á lista í sumum öðrum kjördæmum með uppstillingu.
