Hjálmar segist vera að svara ákalli kjósenda

eftir Silju Björk Huldudóttur silja@mbl.is
„Ég hef verið þægur fyrsti stýrimaður í 12 tólf ár í 2. sætinu og finnst orðið tímabært að fyrsti stýrimaður fái að fara sem kapteinn í einn róður," segir Hjálmar Árnason, formaður þingflokks Framsóknarflokksins, sem í gær tilkynnti að hann hygðist bjóða sig fram í fyrsta sæti flokksins í Suðurkjördæmi. Í því sæti situr fyrir Guðni Ágústsson, landbúnaðarráðherra og varaformaður flokksins, en hann hefur leitt listann í kjördæminu sl. 12 ár.

Kemur Guðna í opna skjöldu

„Þetta kemur mér í opna skjöldu," segir Guðni í samtali við Morgunblaðið og bætir við: „Hjálmar Árnason lýsti því yfir á kjördæmisþingi okkar sem haldið var í Reykjanesbæ í nóvember sl. að hann sjálfur myndi áfram sækjast eftir því að vera í 2. sæti á framboðslistanum en lýsti því jafnframt yfir að hann styddi heilshugar framboð mitt í 1. sæti enda væri ég varaformaður flokksins og ráðherra kjördæmisins. Þannig að nú hefur honum snúist hugur og er á einhverri hringferð sem ég átta mig ekkert á." Aðspurður segist Guðni ekki hafa trú á öðru en að hann haldi 1. sætinu enda eigi hann góðan stuðning í kjördæminu öllu.

Spurður hvað búi að baki ákvörðun sinni rifjar Hjálmar upp að á síðasta kjördæmaþingi hafi verið ákveðið að fara prófkjörsleiðina í kjördæminu í stað uppstillingar. „Í því felast skýr skilaboð um breytingar á listanum," segir Hjálmar og rifjar upp að hann hafi á þeim tíma lýst því yfir að hann hygðist stefna á 2. sætið. „Í millitíðinni hafa verið haldin tvö prófkjör annarra flokka í Suðurkjördæmi þar útkoma Suðurnesjamanna hefur verið hrakleg þrátt fyrir þá staðreynd að þeir eru 45% af kjördæminu og það hefur breytt hinu pólitíska landslagi," segir Hjálmar, sem í gærmorgun var afhent áskorun tæplega tvö þúsund stuðningsmanna um að hann gefi kost á sér í 1. sætið. Tekur hann fram að hann hafi einnig fengið mikla hvatningu úr öðrum hlutum kjördæmisins, alla leið austur til Hornafjarðar. „Ég tel það skyldu stjórnmálamanns að leggja við hlustir og þegar það koma svona sterkar raddir frá kjósendum þá verður maður að bregðast við. Ég teldi það pólitískt ábyrgðarleysi að bregðast ekki við ákalli fólks í kjördæminu þveru og endilöngu."

Framboðsfrestur í prófkjör framsóknarmanna í Suðurkjördæmi rann út í gær. Alls gefa tólf frambjóðendur kost á sér. Guðni og Hjálmar gefa sem fyrr er getið báðir kost á sér í 1. sæti. Bjarni Harðarson, Björn Bjarndal Jónsson og Eygló Harðardóttir gef kost á sér í 2. sæti. Elsa Ingjaldsdóttir og Kjartan Lárusson sækjast eftir 3. sæti og Guðni Sighvatsson eftir 3.–4. sæti. Brynja Lind Sævarsdóttir sækist eftir 4. sæti. Gissur Jónsson gefur kost á sér í 4.–6. sæti. Lilja Hrund Harðardóttir og Ólafur Elvar Júlíusson gefa kost á sér í 5.–6. sæti.