Frjálslyndir undirbúa framboð

Frjálslyndi flokkurinn hefur ekki gengið formlega frá neinum framboðslistum en unnið er af kappi að undirbúningi framboða, skv. upplýsingum Magnúsar Reynis Guðmundssonar framkvæmdastjóra flokksins.

Framboðsmál eru að skýrast í Suðurkjördæmi, Suðvesturkjördæmi og Norðausturkjördæmi og póstkosning að fara í gang í Norðvesturkjördæmi. Þar verður kosið um 5 sæti. Guðjón Arnar Kristjánsson formaður gefur kost á sér í 1. sæti en meðal þeirra sem gefa kost á sér, skv. upplýsingum Magnúsar, eru Sigurjón Þórðarson fv. þingmaður sem býður sig fram í 1. til 5 sæti. og Magnús Þór Hafsteinsson fv. þingmaður og Ragnheiður Ólafsdóttir varaþingmaður sem bjóða sig bæði fram í 2. sætið. Stjórn kjördæmafélagsins í NA-kjördæmi hefur lagt til að Ásta Hafberg skipi 1. sætið og í Suðurkjördæmi er lagt til að Grétar Mar Jónsson þingmaður skipi 1. sætið.

 Undirbúningur er skemmra á veg kominn í Reykjavík. Miklar breytingar eru í forystu flokksins en þingmennirnir Jón Magnússon og Kristinn H. Gunnarsson hafa yfirgefið flokkinn.