Siv Friðleifsdóttir, alþingismaður er í efsta sæti hjá Framsóknarflokknum í Suðvesturkjördæmi þegar 250 atkvæði af tæplega 1.100 hafa verið talin. Konur eru í fimm efstu sætunum en samkvæmt reglum prófkjörsins verða tilfæringar á sætaskipan ef þetta verða úrslitin í prófkjörinu þar sem reglur þess gera ráð fyrir því að að minnsta kosti einn af hvoru kyni skipi þrjú efstu sæti listans.

Eftir að 250 atkvæði hafa verið talin er skipan sæta eftirfarandi: 

1. Siv Friðleifsdóttir 116 atkvæði

1.-2. sæti Helga Sigrún Harðardóttir 119 atkvæði

3. sæti Svala Rún Sigurðardóttir 92 atkvæði

1.-4. sæti Una María Óskarsdóttir 119 atkvæði

1.-5. sæti Bryndís Bjarnarson 149 atkvæði

Að sögn Einars Sveinbjörnssonar, formanns kjörstjórnar, gera reglurnar jafnframt ráð fyrir því að í fyrstu fimm sætunum séu hið minnsta tveir af hvoru kyni og því ljóst að ef talning fyrstu 250 atkvæða endurspeglar lokaniðurstöðuna þá verði að flytja tvo karla upp í fimm efstu sætin. Ekki er gert ráð fyrir því að lokaniðurstaða prófkjörsins liggi fyrir fyrr en um miðnætti.