Netkosning hafin hjá Samfylkingu í Reykjavík

mbl.is

Prófkjör Samfylkingarinnar í Reykjavík vegna vals á framboðslista til 
Alþingiskosninga 2009 hefst í dag, mánudaginn 9. mars og lýkur 
laugardaginn 14. mars kl. 18. Kjörið fer fram á netinu, á 
vefsvæði Samfylkingarinnar, samfylking.is og því mögulegt að kjósa 
hvar sem er, svo lengi sem tölva, nettenging og aðgangur að 
heimabanka eru til staðar, segir í frétt frá Samfylkingunni.

Hefðbundinn kjörstaður verður í 
kosningamiðstöð Samfylkingarinnar á Skólabrú við Austurvöll. 
Kjörstaðurinn verður opinn 9. - 13. mars kl. 14 - 20 alla dagana. 
Laugardaginn 14. mars verður opið kl. 9 - 18.

Um 8000 félagsmenn eru á kjörskrá en kosningarétt hafa félagar í 
Samfylkingarfélögunum í Reykjavík sem voru skráðir félagar þann 28. 
febrúar 2009 og eiga lögheimili eða hafa kosningarétt í Reykjavík. 
Miðað er við skráð lögheimili í þjóðskrá sunnudaginn 1. mars 2009. 
Framvísa þarf persónuskilríkjum á kjörstað.

Kosið verður um 8 fyrstu sætin á framboðslistum Samfylkingarinnar í 
Reykjavíkurkjördæmunum tveimur. Alls taka 19 frambjóðendur þátt í 
prófkjörinu, en Ingibjörg Sólrún Gísladóttir þingmaður og formaður 
Samfylkingarinnar hefur dregið framboð sitt til baka af 
heilsufarsástæðum. Eftirtaldir eru í framboði:

Anna Pála Sverrisdóttir formaður Ungra jafnaðarmanna, Ásta Ragnheiður 
Jóhannesdóttir félags- og tryggingamálaráðherra, Björgvin Valur 
Guðmundsson leiðbeinandi, Dofri Hermannsson varaborgarfulltrúi, Helgi 
Hjörvar þingmaður, Hörður J. Oddfríðarson áfengis- og 
vímuefnaráðgjafi og formaður Sundsambands Íslands, Jóhanna 
Sigurðardóttir forsætisráðherra, Jón Daníelsson blaðamaður og 
þýðandi, Jón Baldvin Hannibalsson fyrrv. formaður Alþýðuflokksins, 
Mörður Árnason íslenskufræðingur, Pétur Tyrfingsson sálfræðingur, 
Sigríður Arnardóttir félags- og fjölmiðlafræðingur, Sigríður 
Ingibjörg Ingadóttir hagfræðingur og sagnfræðingur, Sigurbjörg 
Sigurgeirsdóttir stjórnsýslufræðingur og félagsfræðingur, Skúli 
Helgason stjórnmálafræðingur, Steinunn Valdís Óskarsdóttir þingmaður, 
Sverrir Jensson veðurfræðingur, Valgerður Bjarnadóttir sviðsstjóri og 
Össur Skarphéðinsson iðnaðar- og utanríkisráðherra.

Nánari upplýsingar um netkosninguna má finna á vefsvæði 
Samfylkingarinnar, samfylking.is.