Segir Samfylkinguna að einangrast í ESB-umræðunni
Jón Bjarnason. mbl.is/Ómar
Jón Bjarnason, þingmaður Vinstrihreyfingarinnar græns framboðs, segist fagna því að mikill meirihluti þjóðarinnar virðist styðja stefnu VG um að Íslandi sé betur borgið sem sjálfstæðu ríki utan Evrópusambandsins. Hann segir Samfylkinguna hins vegar vera að einangrast í málinu.
Jón, sem vísar í könnun Fréttablaðsins frá því á laugardag, segir greinilegt að áhugi fólks á ESB fari dvínandi. Liðlega 70% stuðningsmanna VG séu andvígir aðildarviðræðum. Niðurstaðan eigi ekki að koman neinum á óvart.
Hann segir hins vegar að Samfylkingin virðist vera að einangrast í ákafa sínum á ESB, en 86,5% stuðningsmanna flokksins segist vilja aðildarviðræður.
„Er það svo sem í samræmi við þann einfalda málflutning ýmissa forystumanna Samfylkingarinnar sem ímynda sér að í aðild að ESB felist lausn allra mála, bæði stórra og smáa,“ skrifar Jón á bloggsíðu sína.
