Undrandi á frambjóðendum í NV-kjördæmi

Vilhjálmur Birgisson, formaður Verkalýðsfélags Akraness. SteinarH

„Það vakti mikla furðu þegar ég komst að því að ekki var fyrirhugað að halda opinn borgarafund hér á Akranesi fyrir einar mikilvægustu alþingiskosningar sem haldnar hafa verið hér síðustu áratugi. Vel á fimmta þúsund kjósendur í Norðvesturkjördæmi eru búsettir á Akranesi, eða sem nemur 21% allra kjósenda kjördæmisins,“ segir Vilhjálmur Birgisson formaður Verkalýðsfélags Akraness. Hann boðar til opins stjórnmálafundar með frambjóðendum á sunnudag.

Á þeirri forsendu hversu gríðarlega mikilvægar þessar kosningar eru fyrir heimilin og fyrirtækin í þessu landi ákvað Verkalýðsfélag Akraness að standa fyrir opnum borgarafundi á sunnudaginn kemur.

Vilhjálmur Birgisson segir verkalýðsfélagið vilja fá skýr svör frá frambjóðendum flokkanna um hver úrræði þeirra séu fyrir fólkið og fyrirtækin í þessu landi. um þessar mundir blæði íslenskum heimilum illilega vegna þess efnahagshruns sem hefur orðið í kjölfar bankahrunsins.

Fundurinn verður haldinn í Bíóhöllinni á Akranesi og hefst klukkan 15:00.