„Áður verið í þessari stöðu“

Róbert Marshall er þriðji maður á lista Samfylkingarinnar í Suðurkjördæmi.

„Ég hef verið í þessari stellingu áður og varð ekki þingmaður þá, þannig að maður bíður rólegur eftir að fá fleiri tölur og betri yfirsýn,“ segir Róbert Marshall, þriðji maður á lista Samfylkingarinnar í Suðurkjördæmi. Hann er nú staddur í Vestmannaeyjum og fylgist með tölunum streyma inn.

Samfylkingin bætir við sig mann í kjördæminu og er Róbert því inni sem stendur, sem sjöundi þingmaður Suðurkjördæmis. Í kosningunum árið 2007 leit á tímabili út fyrir að Róbert næði kjöri sem þingmaður en hann féll á endanum út. Þá munaði 56 atkvæðum að hann hefði orðið þingmaður. Hann var því sallarólegur þegar blaðamaður mbl.is sló á þráðinn til hans og sagðist bíða eftir endanlegum tölum áður en hann fangaði um of.

„Þetta er mjög ánægjulegt því við höfum unnið mikla vinnu í Suðurkjördæmi og hér í Eyjum. Þar hefur verið á brattann að sækja,“ segir Róbert.