Guðbjartur: Bjartsýnn á áframhaldandi samstarf
Guðbjartur Hannesson
Guðbjartur Hannesson, efsti maður á lista Samfylkingarinnar í Norðvesturkjördæmi, segist bjartsýnn a að samkomulag náist um áframhaldandi ríkisstjórnarsamstarf Samfylkingarinnar og Vinstri hreyfingarinnar græns framboðs.
„Við erum mjög ánægð með það að ríkisstjórnarflokkarnir nái meirihluta og lítum á það sem viðurkenningu á þeim áherslum sem við höfum lagt í samstarfi okkar,” sagði hann er blaðamaður mbl.is ræddi við hann í nótt.
Guðbjartur sagði að þrátt fyrir að Samfylkingin hafi verið stærsti flokkur kjördæmisins frá því fyrstu tölur voru birtar og fram til klukkan hálf fjögur í nótt þyrði hann lítið að segja fyrr en síðustu tölur hefðu skilað sér. Tölur í kjöldæminu virtust birtar eftir svæðum og reynslan frá síðustu kosningum sýndi að enn gæti margt gerst.
Þetta hafi þó verið markmið Samfylkingarinnar og hann vonaðist til áherslur flokksins í sjávarútvegsmálum og Evrópumálum hafi fundið samhljóm meðal kjósenda í kjördæminu.Spurður um ólíka afstöðu stjórnarflokkanna til Evrópusambandsins sagðist Guðbjartur ekki telja að hún muni standa í vegi fyrir áframhaldandi samstarfi þeirra.
„Við höfum metið það þannig að þjóðin eigi að ráða og ég hef ekki skilið það þannig að Vinsti grænir setji sig upp á móti því. Menn geta svo auðvitað verið ósammála þegar að atkvæðagreiðslu kemur,” sagði hann.
„Við viljum skilgreina samningsmarkmið og láta síðan á þetta reyna. Við lítum svo á að skilaboðin í þessum kosningum séu í samræmi við það. Það er að ekki sé hægt að halda áfram að tala um þetta án þess að láta á það reyna.”
