Gunnar Bragi ánægður með gengi Framsóknarflokksins

Gunnar Bragi Sveinsson skipar efsta sæti á lista Framsóknarflokksins í Norðvesturkjördæmi.

Gunnar Bragi Sveinsson, sem skipar efsta sætið á lista Framsóknarflokksins í  Norðvestur-kjördæmi, var ánægður með gengi Framsóknarflokksins í kjördæminu en flokkurinn bætir við sig einum manni miðað við þær tölur sem birst hafa.

Gunnar Bragi er því væntanlega nýr þingmaður á Alþingi eftir þessar kosningar líkt og Guðmundur Steingrímsson sem skipar annað sætið á lista Framsóknarflokksins í NV-kjördæmi. 

Að sögn Gunnars Braga er mikil stemming á kosningavökum flokksins í kjördæminu en flokksmenn hafa komið víða saman til þess að fylgjast með tölum um leið og þær berast. Gunnar Bragi er staddur á kosningavökunni á Sauðárkróki og segir að ekki verði farið að sofa fyrr en síðasta atkvæði hefur verið talið enda mikil gleði meðal framsóknarmanna í Norðvestur-kjördæmi.