Kemur ekki til greina
Bjarni Benediktsson formaður Sjálfstæðisflokksins mbl.is/Kristinn
Ekki kemur til greina að Sjálfstæðisflokkurinn veiti Samfylkingunni opið umboð til að fara til Brussel og semja um aðild Íslands að Evrópusambandinu, að sögn Bjarna Benediktssonar, formanns Sjálfstæðisflokksins.
Niðurstaða stjórnarflokkanna um Evrópusambandsaðild er að Alþingi verði falið að ákveða endanlega hvort hafnar verði aðildarviðræður við Evrópusambandið. Bjarni segir erfitt að tjá sig um máið áður en hann hefur séð hvernig það verður lagt fram en miðað við fréttir sé þetta staðan.
„Þetta er engin niðurstaða fyrir ríkisstjórnina. Þetta hljómar eins og Steingrímur ætli að leyfa Jóhönnu að leggja fram þingsályktunartillögu sem hefur enga aðra stöðu í þinginu en þingsályktunartillaga frá Borgarahreyfingunni eða einhverjum öðrum þingflokki. Það er staða málsins í þinginu," segir Bjarni.
Sigmundur Davíð Gunnlaugsson, formaður Framsóknarflokksins, segir að hann telji að þingið muni samþykkja almennt þingsályktunartillögu um að fara út í viðræður við Evrópusambandið. Hann kveðst þó telja að það muni ekki ná lengra ef ríkisstjórnin er ekki sammála um málið. „Ég sé ekki fyrir mér að þingið mundi veita Samfylkingunni einni umboð til að fara í slíkar viðræður," segir Sigmundur Davíð.
Sigmundur Davíð, formaður Framsóknarflokksins. mbl.is/Kristinn
