Flokksstjórn Samfylkingar þingar um stjórnarsáttmála

Flokksstjórnarfundur Samfylkingar á Sögu
Flokksstjórnarfundur Samfylkingar á Sögu mbl.is/Árni Sæberg

Fundur flokksstjórnar Samfylkingarinnar hófst í Súlnasal Hótels Sögu klukkan eitt. Þar verður stjórnarsáttmálinn kynntur og sömuleiðis ráðherraskipan. Þingflokkur Samfylkingarinnar þingaði áður en flokksstjórn kom saman og gekk frá ráðherraskipan.

Ný ríkisstjórn veðrur kynnt í Norræna húsinu klukkan fjögur í dag. Að því loknu verður efnt til tveggja ríkisráðsfunda á Bessastöðum. Ríkisstjórn VG og Samfylkingar verður söguleg að því leyti að þetta verður fyrsta meirihlutastjórn tveggja vinstri flokka á Íslandi.

Meginstef stjórnarsáttmála nýrrar ríkisstjórnar verður endurreisn íslensks samfélags, aðgerðir í þágu heimilanna og fyrirtækja, endurreisn bankakerfis og uppbygging atvinnulífs.

Líklegt er að ráðuneytum fækki um eitt að minnsta kosti og liggur fyrir tillaga um atvinnuvegaráðuneyti, sem fari með verkefni sem nú eru hjá iðnaðar-, landbúnaðar og sjávarútvegsráðuneytum. Stærri uppstokkanir á stjórnskipan bíða að líkindum til áramóta.

Tveir nýir ráðherrar eru nefndir, þau Svandís Svavarsdóttir VG og Árni Páll Árnason, Samfylkingu.

Rætt er um að Alþingi verði kvatt saman eftir viku, annaðhvort föstudaginn 15 maí eða mánudaginn 18. maí. Ekkert hefur þó verið endanlega ákveðið í þeim efnum.

Flokksstjórnarfundur Samfylkingarinnar á Sögu
Flokksstjórnarfundur Samfylkingarinnar á Sögu mbl.is/Árni Sæberg
mbl.is
Fleira áhugavert
Fleira áhugavert