Júlíus Vífill vill 2. sætið

Júlíus Vífill Ingvarsson.

Júlíus Vífill Ingvarsson, borgarfulltrúi, býður sig fram í 2. sætið í prófkjöri Sjálfstæðisflokksins í Reykjavík. Hann var í 5. sæti á lista sjálfstæðismanna fyrir síðustu borgarstjórnarkosningar vorið 2006 en bauð sig einnig fram í 2. sætið í prófkjöri, sem þá var haldið.

Júlíus Vífill er lögfræðingur að mennt en lagði einnig stund á tónlistarnám og starfaði sem óperusöngvari um árabil. Fram til árins 2003 var hann framkvæmdastjóri í atvinnurekstri á samkeppnismarkaði. 　

Hann er formaður skipulagsráðs Reykjavíkur og formaður Faxaflóahafna sf. en fyrri hluta þessa kjörtímabils var Júlíus Vífill formaður menntaráðs Reykjavíkur. Hann hefur setið í borgarstjórn í samtals tvö kjörtímabil. Júlíus Vífill er stjórnarformaður Íslensku óperunnar og situr í stjórn Sinfóníuhljómsveitar Íslands. Hann er formaður stjórnar Skákakademíu Reykjavíkur og Tónlistarskólans í Reykjavík.

Júlíus Vífill er kvæntur Svanhildi Blöndal, presti og hjúkrunarfræðingi. Þau eiga fjögur börn.