Sverja af sér fund Ólafs

Ólafur F. Magnússon. Kristinn Ingvarsson

Frjálslyndi flokkurinn hefur sent frá sér yfirlýsingu þar sem hann segir að fundur, sem Ólafur F. Magnússon, borgarfulltrúi, hefur auglýst á vegum borgarmálafélags F-listans í Reykjavík, sé ekki boðaður af Frjálslynda flokknum og ekki heldur af borgarmálafélagi Frjálslynda flokksins.

„Fundurinn virðist vera boðaður af einkahlutafélagi skrásett á heimili Ólafs F. Magnússonar að Vogalandi 5. sem hann stofnaði í óþökk Frjálslynda flokksins og skírði „Borgarmálafélag F-lista.“  Frjálslyndi flokkurinn minnir á að Ólafur F. Magnússon hefur sagt sig úr Frjálslynda flokknum og er að best er vitað utan flokka sem borgarfulltrúi," segir í tilkynningu flokksins.

Þar segir einnig, að félag sem tengi sig við listabókstafinn F geti ekki verið stofnað af fólki utan Frjálslynda flokksins. Framboðslisti verði ekki borinn fram undir listabókstafnum F nema af Frjálslynda flokknum og með samþykki hans. „Af fenginni reynslu eru engar líkur til þess að Frjálslyndi flokkurinn tengist í framtíðinni framboðsmálum Ólafs F. Magnússonar," segir síðan í tilkynningu Frjálslynda flokksins.