Þorleifur kærir póstkosningu VG

Þorleifur Gunnlaugsson og Sóley Tómasdóttir bíða eftir fyrstu tölum á laugardagskvöld. mbl.is/GSH

Þorleifur Gunnlaugsson hefur gert kært framkvæmd utankjörfundaratkvæðagreiðslu í prófkjöri Vinstri grænna í Reykjavík um helgina. Þorleifur sóttist  eftir fyrsta sætinu en tapaði því fyrir Sóleyju Tómasdóttur og hreppti sjálfur annað sætið.

Að sögn Stefáns Pálssonar formanns kjörstjórnar gerir Þorleifur athugasemdir við póstkosninguna þar sem hann telji að hluti hennar kunni að hafa orkað tvímælis.

„Öðrum þræði er hann bara að spyrja út í hluti sem hann vill fá staðfesta," segir Stefán. „Hann tekur reyndar fram í skeytinu að hann sé ekkert að falast eftir fyrsta sætinu enda liggur það alveg fyrir að jafnvel þó svo brugðist yrði við þessu með því að taka öll utankjörfundaratkvæðin út þá breytir það ekki niðurstöðunni."

Stefán segir málið því fyrst og fremst snúast um að greiða úr vafaatriðum. Sömu reglur hafi hinsvegar verið notaðar við kosningarnar í ár líkt og í tveimur síðustu forvölum VG og þær hafi reynst vel. „En maður skilur þetta alveg, þessi kærufrestur er til staðar og það er sjálfsagt mál að bregðast við því enda  gott að fá þessa hluti á hreint upp á framtíðina að gera.  En þetta mun ekki hafa nein áhrif á úrslitin."

Kjörstjórnin mun taka athugasemdir Þorleifs til skoðunar síðar í dag og verður niðurstaðan kunngerð eftir að kærufrestur rennur út í kvöld reglum samkvæmt, tveimur sólarhringum eftir að úrslit lágu fyrir.