Nokkrir af oddvitum VG í kosningunum í vor. hag / Haraldur Guðjónsson

Vinstrihreyfingin - grænt framboð, VG, býður fram eigin lista í 14 sveitarfélögunum fyrir sveitarstjórnarkosningarnar 29. maí. Tvö framboð eru undir hatti VG og óháðra, auk þess sem flokkurinn tekur þátt í níu blönduðum framboðum. Alls verða áherslur VG því í boði í 25 sveitarfélögum í kosningunum, samkvæmt tilkynningu frá VG. Að auki eiga félagar í VG víða sæti á óflokksbundnum listum.

VG býður nú í þriðja sinn fram til sveitarstjórnarkosninga frá því að flokkurinn var stofnaður árið 1999. Fyrst tók hann þátt í kosningunum árið 2002 með lista á átta stöðum. Árið 2006 bauð VG fram í 12 sveitarfélögum og fékk alls 21 fulltrúa kjörinn, til samanburðar við aðeins þrjá í fyrstu kosningum VG fjórum árum áður.

VG býður fram V-lista á eftirtöldum stöðum: Akranesi, Akureyri, Árborg, Borgarbyggð, Hafnarfirði, Kópavogi, Mosfellsbæ, Norðurþingi, Reykjanesbæ, Reykjavík, Seyðisfirði, Strandabyggð, Hornafirði og Skagafirði. Með óháðum er VG með lista í Grindavík og Rangárþingi eystra.

Þá kemur VG að blönduðum framboðum á eftirtöldum stöðum:

Álftanesi (Á-listi), Fljótsdalshéraði (L-listi), Grundarfirði (L-listi), Hveragerði (A-listi), Ísafirði (Í-listi), Seltjarnarnesi (N-listi), Stykkishólmi (L-listi), Vestmannaeyjum (V-listi) og  Ölfusi (Ö-listi).