Framsóknarmenn í Kópavogi kynntu málefnaskrá sína í dag.

Fjölskyldumál og atvinnumál ungs fólks í Kópavogi eru á oddinum hjá Framsóknarmönnum í Kópavogi fyrir sveitarstjórnarkosningarnar, að því er fram kom í máli Ómars Stefánssonar oddvita flokksins þegar málefnaskrá flokksins var kynnt á blaðamannafundi í dag.

„Framsóknarmenn leggja áherslu á að ekkert barn verði útundan.  Það á við hvort sem er í íþrótta-, æskulýðs eða öðru félagsstarfi. Ekkert barn verði án aðgangs að dægradvöl eða skólamáltíðum vegna bágrar fjárhagsstöðu foreldra eða forráðamanna," segir í tilkynningu frá Framsókn í Kópavogi.

Þá segir að framsóknarmenn leggi áherslu á sparnað í rekstri bæjarfélagsins og vilji flatan 10% niðurskurð á launum bæjarfulltrúa og nefndarfólks. Einnig að fækka skuli nefndum  og teknar verði upp viðræður við nágrannasveitarfélög um nánara samstarf og samvinnu á sem flestum sviðum.

Í tilkynningunni kemur einnig fram að í samvinnu við Vinnumálastofnun og fyrirtæki telja Framsóknarmenn að hægt sé að skapa 300 störf fyrir atvinnulaus ungmenni á aldrinum 18-24 ára.

Flokkurinn vill að gerður sé samningur við fyrirtæki í Kópavogi og bærinn og Vinnumálastofnun komi að greiðslu hluta launanna á meðan starfsmaðurinn er að vinna sér inn reynslu og þekkingu. Í framhaldinu sé þá fyrirtækið komið með vel hæfan starfsmann sem það hefur hag í að halda áfram í vinnu innan fyrirtækisins.

Málefnaskrá Framsóknarflokksins í Kópavogi