Oddvitar Samfylkingarinnar og Vinstri hreyfingarinnar – græns framboðs í Hafnarfirði ákváðu í gærkvöldi að hefja formlegar meirihlutaviðræður. Málefnavinna fjögurra flokka í Kópavogi er langt komin og telur oddviti Samfylkingarinnar að vinna við myndun nýs meirihluta fari langt í dag.

Fulltrúar Samfylkingarinnar, VG, Lista Kópavogsbúa og Næst besta flokksins hafa rætt saman um myndun nýs meirihluta frá því á sunnudag. Flokkarnir eru samtals með sex fulltrúa, Samfylkingin þrjá og hinir einn hver. Í gær var langur fundur viðræðunefndar sem skipuð er tveimur fulltrúum frá hverju framboði. Guðríður Arnardóttir, oddviti Samfylkingarinnar, segir að fulltrúarnir séu að ljúka málefnavinnu.

Hún segir að oddvitar flokkanna hittist í dag og þá verði jafnframt rætt um verkaskiptingu. Hún telur að vinnan fari langt í dag, jafnvel að það takist að ljúka henni. „Ég er mjög bjartsýn. Það er ótrúlega mikill samhljómur á milli þessara hópa,“ segir Guðríður.

Guðmundur Rúnar Árnason, oddviti Samfylkingar í Hafnarfirði, segist vongóður um að viðræðurnar við VG gangi vel. Í gærkvöldi hafi ýmis málefni verið til umræðu og í dag hefjist viðræður af fullu kappi. „Ég held að það séu allar forsendur fyrir því að þetta gangi vel.“ Guðrún Ágústa Guðmundsdóttir, oddviti Vinstri grænna, tekur í sama streng.