Dagur B. Eggertsson og Jón Gnarr ræðast við um meirihlutasamstarf í borginni.

Besti flokkurinn og Samfylking funda nú þriðja daginn í röð um myndun nýs meirihluta í Reykjavíkurborg. Ekki fæst uppgefið hvar „leynifundurinn“ fer fram.

Oddný Sturludóttir sem skipar annað sætið á lista Samfylkingarinnar vill lítið gefa upp um gang viðræðna. „Það gengur bara vel og andrúmsloftið er mjög gott,“ segir hún í samtali við Kosningavef mbl.is. 

Auk hennar sitja Dagur B. Eggertsson oddviti og Björk Vilhelmsdóttir, sem skipar þriðja sætið, fundinn. Fyrir Besta flokkinn sitja Jón Gnarr og Óttar Proppé.

Á morgun verður fleira fólk úr báðum flokkum kallað að borðinu að sögn Oddnýjar. Flokkarnir muni gefa sér góðan tíma í viðræðurnar.

The Wire afhent á leynifundi 

Á fésbókarsíðum Besta flokksins og Samfylkingarinnar í Reykjavík eru einu fréttirnar af viðræðunum í dag þær að Jón Gnarr hafi afhent Degi mynddisk með þáttunum The Wire, en Besti flokkurinn hafði lýst því yfir í kosningabaráttunni að það væri ófrávíkjanleg krafa að samstarfsfólk flokksins hefði horft á þættina. Þættirnir fjalla um undirheima Baltimore borgar í Bandaríkjunum.

Hvorki Dagur B. Eggertsson né Jón Gnarr hafa gefið kost á viðtölum við mbl.is í dag.

Samkvæmt leynifundadagskrá sem þegar hefur verið lögð fram á meðal annars að ræða verkaskiptingu á fundi morgundagsins. Auðlindamál og Orkuveitan voru hins vegar til umfjöllunar í dag samkvæmt dagskránni.

Að sögn Heiðu Kristínar Helgadóttur kosningastjóra Besta flokksins halda flokkarnir sig við áður boðaða leynifundadagskrá. „Það eru allir glaðir og þetta gengur bara vel," sagði Heiða í samtali við mbl.is.

Fagnaðarefni hve margar hugmyndir borgarbúar leggja fram 

Borgarbúum hefur síðustu daga gefist kostur á að leggja sínar hugmyndir inn í viðræðurnar í gegnum vefinn Betri Reykjavík. Alls hafa 2.284 hugmyndir hafa spunnist útfrá þeim 388 málum sem lögð hafa verið fram á vefnum.

„Það er mikið fagnaðarefni hversu margir Reykvíkingar eru búnir að segja skoðun sína á málefnum Reykjavíkur. Þetta er liður í áherslum beggja flokka um aukin áhrif íbúanna,“ segir Oddný.