Bæjarstjórnin í Sandgerði

Fyrsti fundur nýrrar bæjarstjórnar í Sandgerði var haldinn þann 16. júní s.l.  Þá tók meirihluti S-listans við stjórnartaumunum.  Ólafur Þór Ólafsson, oddviti Samfylkingarinnar, K-listans og óháðra borgara, er nýr forseti bæjarstjórnar og Sigursveinn Bjarni Jónsson verður formaður bæjarráðs.

Á fundinum var gengið frá skipan í nefndir og ráð bæjarins og samþykkt tillaga um að staða bæjarstjóra verði auglýst laus til umsóknar.  Þá var ósk fráfarandi bæjarstjóra, Sigurðar Vals Ásbjarnarsonar, um lausn frá skyldum sem bæjarfulltrúi samþykkt þar sem hann mun flytja lögheimili sitt frá bæjarfélaginu.  Hólmfríður Skarphéðinsdóttir tekur sæti hans í bæjarstjórninni, að því er segir á vef sveitarfélagsins.