Kosið beint í hverfisráð

mbl.is/Golli

Á borgarstjórnarfundi í gær var samþykkt tillaga Sjálfstæðisflokksins um að hefja undirbúning beinnar kosningar íbúa í hverfisráð Reykjavíkurborgar. Þetta kemur fram í fréttatilkynningu frá Sjálfstæðisflokknum.

„ Tilgangur tillögunnar er að auka markvisst íbúalýðræði í borginni og tryggja að íbúar hafi sem flest tækifæri til aðkomu að ákvörðunum á vettvangi Reykjavíkurborgar.  Borgarfulltrúar Sjálfstæðisflokksins telja mikilvægt að fulltrúar íbúa eigi þess kost að taka sæti í hverfisráðum en ekki aðeins til áheyrnar eins og nú er.  Bein kosning getur farið fram á netinu eða með öðrum hætti sem best kemur til móts við óskir íbúa," segir í fréttatilkynningu.