Ólafur Ragnar spilaði á fylgið
Setja bókamerki
Ólafur Ragnar Grímsson króaði Þóru Arnórsdóttur af gagnvart hægra fylginu með því að hengja kröftuglega á hana stimpil Samfylkingarinnar og tengja hana við ESB aðild. Hann spilaði þannig á fylgið, segir Stefán Ólafsson prófessor við Háskóla Íslands.
Stefán skrifar pistil um kosningarnar á vefsvæði sitt. Hann bendir á að fimmta kjörtímabil Ólafs hefji hann með mestum stuðningi sjálfstæðismanna en sitt fyrsta hóf hann með stuðningi vinstri manna. „Hann skipti um stuðningsmannahóp!“
Hann segir Ólaf hafa lesið landslagið á kjósendamarkaðinum af fagmennsku og séð að hægra fylgið var á lausu. „Það var enginn sterkur hægri frambjóðandi í boði. Hann þurfti því einungis að tryggja sér stuðning hægri manna til að ná meirihluta.“
Það hafi hann gert með því að þykjast vera í stjórnarandstöðu og lýsa yfir andstöðu við Evrópusambandið. „En þessu til viðbótar króaði hann Þóru af gagnvart hægra fylginu með því að hengja kröftuglega á hana stimpil Samfylkingarinnar og tengja hana við ESB aðild, með heldur ósvífnum hætti. Þetta tókst líka og þar með var Þóra komin í vörn og átti lítil sóknarfæri gagnvart hægra fylginu.“
Þannig hafi hann spilað á fylgið, rekið það í réttirnar og dregið hægri menn í dilka. „Er hann þá orðinn sjálfstæðismaður núna? Nei, ég held ekki. Hann mun halda sinni stefnu, ÓRG-stefnunni. Sú stefna snýst um að tryggja að pólitískur ferill hans verði einstakur í sögu þjóðarinnar, óháð flokkum, stjórnum og stjórnarandstöðum.“
Starfsfólk gæti fengið reikning frá Skattinum
„Það er skiljanlegt að þolinmæði þeirra sé lítil“
Stóraukið fé til samgöngusáttmála
Segir óábyrgt að skipta út öllu bankaráðinu
„Menn eru bara búnir að forgangsraða“
„Þögnin er ærandi“
Ofsóttur innan veggja Boeing