Innlent | Kosningar | mbl | 3.4.2013 | 11:32 | Uppfært 11:55

Framsókn fengi 10 þingmenn í NA- og S-kjördæmi

Mynd 1 af 6 Fjóla Hrund Björnsdóttir skipar fimmta sætið á lista Framsóknarflokksins í Suðurkjördæmi

Mynd 2 af 6 Hjálmar Bogi Hafliðason er í fimmta sæti hjá Framsóknarflokknum í Norðausturkjördæmi

Mynd 3 af 6 Karl Garðarsson skipar annað sætið á lista Framsóknarflokksins í Reykjavík suður

Mynd 4 af 6 Sigrún Magnúsdóttir er í öðru sæti lista Framsóknarflokksins í Reykjavík norður mbl.is

Mynd 5 af 6 Elsa Lára Arnardóttir er í þriðja sæti á lista Framsóknarflokksins í Norðvesturkjördæmi

Mynd 6 af 6 Þorsteinn Sæmundsson skipar þriðja sætið á lista Framsóknarflokksins í Suðvesturkjördæmi

Samkvæmt Þjóðarpúlsi Gallups er fylgi Framsóknarflokksins mest í Norðausturkjördæmi og Suðurkjördæmi. Samtals fengi flokkurinn tíu kjördæmakjörna þingmenn í þeim tveim kjördæmum ef kosið yrði í dag. Þetta kemur fram á vef RÚV.

Framsókn, Sjálfstæðisflokkur og Samfylkingin fengju jafn marga þingmenn í Reykjavík

Í Reykjavíkurkjördæmi suður fengi Framsóknarflokkurinn tvo kjördæmakjörna þingmenn, Sjálfstæðisflokkurinn tvo, Samfylkingin tvo menn, Björt framtíð tvö og Vinstri græn einn. Skiptingin er sú sama í Reykjavíkurkjördæmi norður.

Í Suðvesturkjördæmi fengi Framsóknarflokkurinn þrjá kjördæmakjörna þingmenn, Sjálfstæðisflokkurinn þrjá, Samfylkingin tvo menn, Björt framtíð tvo og Vinstri græn einn.

Í Norðvesturkjördæmi fengi Framsóknarflokkurinn þrjá menn, Sjálfstæðisflokkurinn tvo, Samfylking einn, Björt framtíð einn og Vinstri græn engan.

Í Norðausturkjördæmi fengi Framsóknarflokkurinn fimm menn, Sjálfstæðisflokkur tvo, Samfylking einn, Björt framtíð engan og Vinstri græn einn.

Í Suðurkjördæmi fengi Framsóknarflokkurinn fimm kjördæmakjörna menn, Sjálfstæðisflokkurinn þrjá, Samfylking einn en hvorki Björt framtíð né Vinstri græn næðu kjördæmakjörnum þingmanni inn, samkvæmt frétt á vef RÚV.