Bæjarstjórnin í Seltjarnarnesbæ hefur samtals fundað í 56 mínútur á fimm fundum það sem af er þessu ári.
Ásgerður Halldórsdóttir, bæjarstjóri í Seltjarnarnesbæ, segir að fundirnir taki gjarnan stuttan tíma sökum þess hve góð samvinna er í nefndum bæjarins. Lengsti fundur ársins var 22. janúar og tók hann 22 mínútur. Sá stysti var 26. febrúar og tók fjórar mínútur.
„Þetta er vegna góðs samstarfs á milli minni- og meirihluta allt kjörtímabilið. Það er búið að ræða málin mjög vel í nefndum. Bæjarstjórn fer yfir fundargerðir nefnda og í flestum tilvikum hefur ekki þótt ástæða til að ræða það frekar þar sem umræðan hefur farið fram áður,“ segir Ásgerður í Morgunblaðinu í dag.