Bæjarfulltrúar Sjálfstæðisflokksins og Bjartrar framtíðar hafa gert með sér sáttmála um myndum meirihluta bæjarstjórnar, sem ber yfirskriftina Hafnarfjörður – horfir á móti sól. Hann var lagður fram á fundi bæjarstjórnar Hafnarfjarðar fyrr í dag. Á fundinum var einnig kosið í ráð og nefndir á vegum bæjarins.
Guðlaug Kristjánsdóttir frá Bjartri framtíð var kosin forseti bæjarstjórnar og Rósa Guðbjartsdóttir, Sjálfstæðisflokki, formaður bæjarráðs.
Í sáttmálanum kemur fram að áhersla sé lögð á ábyrga langtímahugsun í stefnumótun og stjórn bæjarins. Skýr markmið og sátt um framtíðarsýn sé grunnar að farsælu verki. Því verði á kjörtímabilinu unnið að gerð langtímastefnu um framtíð bæjarins og leitað eftir frumkvæði og þátttöku bæjarbúa og samstöðu innan bæjarstjórnar.
Rósa Guðbjartsdóttir, formaður bæjarráðs, segir í tilkynningu spennandi tíma framundan í Bæjarstjórn Hafnarfjarðar og það sé tilhlökkun í hópnum að takast á við þau verkefni sem framundan eru. „Við munum leggja okkur fram við að eiga jákvætt og uppbyggilegt samstarf við alla bæjarfulltrúa og um leið að efla samtal bæjarstjórnar við bæjarbúa.“