Stuðningsmenn Guðna Th. Jóhannessonar forsetaframbjóðanda á kosningavöku á Grand hóteli hrópuðu og fögnuðu mikið þegar fyrstu tölur úr Suðurkjördæmi voru lesnar upp. Sekúndum síðar sló þögn á stuðningsmennina þegar í ljós kom að Halla Tómasdóttir hlaut hér um bil jafnmörg atkvæði og Guðni við fyrstu talningu í kjördæminu.
Kosningastjórn Guðna áætlar að um 500 stuðningsmenn Guðna komi saman á kosningavökunni á Grand hóteli í kvöld.
Sveinn Waage, annar veislustjóra kosningavökunnar, kvaddi sér síðar hljóðs og sagði: „Jæja, fyrstu tölur komnar í hús en ég er viss um að þetta muni breytast til batnaðar,“ við mikinn fögnuð stuðningsmanna.