Lokatölur hafa verið birtar í forsetakosningunum í Reykjavíkurkjördæmi norður. Samkvæmt þeim er Guðni Th. Jóhannesson með 35,4% fylgi og Halla Tómasdóttir með 21,6% fylgi. Er þá miðað við að tekið sé tillit til auðra og ógildra seðla sem voru 552 eða 1,62%. Sé ekki tekið tillit til þeirra er Guðni Th. með 36% fylgi og Halla með 22%.
Andri Snær Magnason hlaut 23,4% atkvæða í kjördæminu og Davíð Oddsson 12,7%.
Sturla Jónsson hlaut 3,36% atkvæða og Elísabet Jökulsdóttir 1,2% eða 408 atkvæði. Aðrir frambjóðendur voru með innan við 1% fylgi.
Á kjörskrá voru 45.850 manns. Atkvæði greiddu 34.050. Kjörsókn er því um 75,1%.
Þegar búið var að telja 46,7% atkvæða er Guðni með 37,9% fylgi á landsvísu en Halla 29,9%.
Það er nokkuð önnur staða en skoðanakannanir bentu til síðustu daga. Í könnun Félagsvísindastofnunar sem birt var á fimmtudag var Guðni með 48,2% fylgi en Halla 17,1%. Í könnun Gallup sem birt var á föstudag var Guðni með 44,6% fylgi og Halla með 18,6%.
„Það er eins og það hafi orðið einhver tilfærsla á milli Guðna og Höllu á síðustu dögum,“ sagði Grétar Þór Eyþórsson, prófessor í stjórnmálafræði, við mbl.is fyrr í kvöld. „Það stendur upp úr að Halla hefur náð mikilli siglingu í lokin.“
Frétt mbl.is: Taktíkin hjá Guðna ekki gengið upp