Búið er að skipa fólk í málefnavinnu vegna stjórnarmyndunarviðræðna Sjálfstæðisflokks, Viðreisnar og Bjartrar framtíðar. Fjórir koma úr hverjum flokki að því er fram kemur á vef Ríkisútvarpsins.
Fyrir Sjálfstæðisflokk: Bjarni Benediktsson, Teitur Björn Einarsson, þingmaður Norðvesturkjördæmis og aðstoðarmaður Bjarna á síðasta kjörtímabili, Svanhildur Hólm, aðstoðarmaður Bjarna, og Áslaug Arna Sigurbjörnsdóttir, ritari flokksins og þingmaður.
Fyrir Viðreisn: Benedikt Jóhannesson, Jóna Sólveig Elínardóttir, varaformaður flokksins og þingmaður, Þorgerður Katrín Gunnarsdóttir og Þorsteinn Víglundsson, þingmenn.
Fyrir Bjarta framtíð: Óttarr Proppé, Björt Ólafsdóttir þingmaður, Theódóra S. Þorsteinsdóttir, þingmaður og bæjarfulltrúi í Kópavogi, og G. Valdimar Valdemarsson sem á sæti í framkvæmdastjórn flokksins.
Frétt mbl.is: Formennirnir bjartsýnir á framhaldið
Formenn flokkanna þriggja, þeir Bjarni Benediktsson, Benedikt Jóhannesson og Óttarr Proppé funduðu saman í fjármálaráðuneytinu í morgun. Sögðust þeir þá bjartsýnir á framhaldið.