Fjórði fundurinn í formlegum stjórnarmyndunarviðræðum Sjálfstæðisflokksins, Viðreisnar og Bjartrar framtíðar hófst klukkan 11:00 í morgun í Alþingishúsinu.
Formenn flokkanna hafa verið fremur bjartsýnir í svörum síðustu daga Óttarr Proppé, formaður Bjartrar framtíðar, sagði til að mynda eftir fund í gær að ástæða til bjartsýni um að þetta gæti gengið aukist dag frá degi.
Formlegar viðræður flokkanna þriggja hófust á mánudaginn en Guðni Th. Jóhannesson, forseti Íslands, veitti Bjarna Benediktssyni, formanni Sjálfstæðisflokksins, umboð til stjórnarmyndunar fyrir áramót í kjölfar óformlegra viðræðna flokkanna.
Áður hefur komið fram að Bjarni yrði forsætisráðherra nái flokkarnir saman um stjórnarsamstarf. Benedikt Jóhannesson, formaður Viðreisnar, sagði í morgun að ekkert væri búið að ræða ráðherraskipan í viðræðum flokkana en sagði að það lægi ljóst fyrir að það yrðu ráðherrar.