Þingmenn Sjálfstæðisflokksins mættu til fundar með Bjarna Benediktssyni, formanni flokksins, nú klukkan 13. Boðað var til fundarins í kjölfar viðræðna Sjálfstæðisflokksins, Viðreisnar og Bjartrar framtíðar sem hófust formlega á mánudag.
Viðræðurnar höfðu þó staðið yfir óformlega í einhvern tíma þar á undan, en Bjarni fékk umboð forseta Íslands til stjórnarmyndunarviðræðna á ný 30. desember.
Bjarni Benediktsson fór í gær á fund Guðna Th. Jóhannessonar, forseta Íslands, til að fara yfir stöðu mála. Vonir standa til að hægt verði að kynna nýja ríkisstjórn og stjórnarsáttmála hennar fyrir miðja næstu viku.