Vilja milljarð árlega gegn ofbeldismálum

Helga Vala Helgadóttir, oddviti Samfylkingarinnar í Reykjavík norður kynnti aðgerðaráætlun ...
Helga Vala Helgadóttir, oddviti Samfylkingarinnar í Reykjavík norður kynnti aðgerðaráætlun í þessum efnum á fundi Femínistafélags Háskóla Íslands í dag. Ljósmynd/Samfylkingin

Samfylkingin segist vilja hefja stórsókn gegn hvers kyns ofbeldi, kynferðisofbeldi, netofbeldi sem og heimilisofbeldi. Vegna þessa vill flokkurinn setja einn milljarð króna árlega í málaflokkinn. Þetta kemur fram í tilkynningu frá Samfylkingunni.

Meðal þeirra atriða sem lagt er til að farið verði í er að fjölga lögregluþjónum, hækka laun þeirra, hafa viðvarandi fræðslu í skólum landsins, samræma þjónustu á neyðarmóttöku og bjóða ókeypis sálfræðiþjónustu.

Segir í tilkynningunni að lögregluþjónum hafi fækkað þrátt fyrir fjölgun íbúa og umtalsverða fjölgun ferðamanna. Er vísað til þess að árið 2007 hafi þeir verið 712 en í ár séu þeir 660. „Við verðum að hækka laun lögregluþjóna til að koma í veg fyrir frekari fækkun í stéttinni. Reynslumiklir lögregluþjónar fara til annarra starfa og allt of margir í langtímaveikindi vegna mikils álags,“ segir jafnframt í tilkynningunni. Þá vill Samfylkingin auka þekkingu til að hægt sé að bregðast hratt við netofbeldi.

Samkvæmt áætluninni er gert ráð fyrir að fræðsla um ofbeldi hvers konar hefjist strax í grunnskólum, en að hún verði einnig í mennta- og háskólum. Bæta á fræðslu til brotaþola og gerenda með það að leiðarljósi að gerendur skilji afleiðingar ofbeldis.

Í heilbrigðiskerfinu er svo lagt til að samræma þjónustu neyðarmóttökunnar um allt land. Þá er lagt til að sálgæsla verði hluti af gjaldfrjálsri heilbrigðisþjónustu.

mbl.is

Bloggað um fréttina